WhatsApp contact numbers: 350 కోట్ల వాట్సాప్ కాంటాక్ట్ నంబర్స్ లీక్ అయ్యాయా? వాట్సాప్ భద్రతా లోపం నిజమేనా?

WhatsApp contact numbers

ప్రపంచంలోనే అత్యంత ప్రజాదరణ పొందిన మెసేజింగ్ ప్లాట్‌ఫామ్ అయిన వాట్సాప్ (WhatsApp), వ్యక్తిగత , వృత్తిపరమైన జీవితంలో కీలక పాత్ర పోషిస్తోంది. ప్రపంచవ్యాప్తంగా సుమారు 350 కోట్లకు పైగా వినియోగదారులను కలిగి ఉన్న ఈ ప్లాట్‌ఫామ్ భద్రతపై ఇటీవల పెద్ద ఎత్తున ఆందోళనలు వ్యక్తమవుతున్నాయి.

సోషల్ మీడియా , కొన్ని వార్తా కథనాలలో, వియన్నా యూనివర్సిటీ పరిశోధకులు వాట్సాప్‌లో ఒక కీలకమైన భద్రతా లోపాన్ని (Security Flaw) గుర్తించినట్లుగా ప్రచారం జరుగుతోంది. ఈ లోపం వల్ల ప్రపంచవ్యాప్తంగా ఉన్న కోట్లాది మంది వినియోగదారుల కాంటాక్ట్ నంబర్స్ లీక్ అయ్యే అవకాశం ఉందని, హ్యాకర్లు లేదా దురుద్దేశపూర్వక వ్యక్తులు ఈ వివరాలను దుర్వినియోగం చేసే ప్రమాదం ఉందని హెచ్చరికలు వైరల్ అవుతున్నాయి.

ప్రస్తుతం అందుబాటులో ఉన్న సమాచారం ప్రకారం, ఈ భద్రతా లోపంపై వాట్సాప్ (మెటా యాజమాన్యం) లేదా వియన్నా యూనివర్సిటీ నుంచి ఎలాంటి అధికారిక ప్రకటన గానీ, పరిశోధన నివేదికలు గానీ, టెక్నికల్ డాక్యుమెంట్లు గానీ విడుదల కాలేదు.

ప్రపంచవ్యాప్తంగా విశ్వసనీయ సైబర్‌భద్రతా సంస్థలూ ఈ హెచ్చరికపై స్పందించకపోవడంతో, ఇది అధికారికంగా ధృవీకరించబడని (Unconfirmed) లేదా అతిశయోక్తితో కూడిన వార్తగా భావించబడుతోంది. వినియోగదారులు అధికారిక సమాచారం లేకుండా ఇలాంటి ప్రచారాలను నమ్మవద్దని సైబర్ నిపుణులు సూచిస్తున్నారు.

దీంతో మరోసారి వాట్సాప్(WhatsApp) ఎంతవరకు సేఫ్ న్న టాపిక్ చర్చకు వస్తోంది. ఇప్పుడు ఒక విషయం చెప్పుకోవాలి. అదే వాట్సాప్ యొక్క భద్రతా వ్యవస్థకు వెన్నెముకగా నిలిచే అంశం ఎండ్-టు-ఎండ్ ఎన్‌క్రిప్షన్ (End-to-End Encryption – E2EE).

E2EE ఈ వ్యవస్థలో, పంపేవారు మరియు స్వీకరించేవారు తప్ప, ఆ మెసేజ్‌ను మధ్యలో ఎవరూ చివరకు వాట్సాప్ సంస్థతో సహా ఎవరూ చూడలేరు లేదా చదవలేరు. ఇది అత్యంత సురక్షితమైన ప్రైవేట్ సంభాషణకు హామీ ఇస్తుంది. వాట్సాప్ ఈ E2EE వ్యవస్థను నిరంతరం బలోపేతం చేస్తూ వస్తోంది.

సాధారణంగా వాట్సాప్ భద్రతకు వచ్చే ముప్పులు ప్లాట్‌ఫామ్ నుంచి కాకుండా, వినియోగదారుల నిర్లక్ష్యం లేదా థర్డ్-పార్టీ సాఫ్ట్‌వేర్ ద్వారా వస్తాయి. ఉదాహరణకు, ఫిషింగ్ లింకులు, మాల్వేర్ ఉన్న యాప్‌లు లేదా ఫోన్ భద్రతా లోపాలు.

తరచూ సేఫ్టీ ఇష్యూలు ఎందుకు వస్తున్నాయి?

వాట్సాప్ వంటి ప్రపంచ స్థాయి ప్లాట్‌ఫామ్‌లలో తరచూ సేఫ్టీ ఇష్యూలు ఎందుకు వస్తున్నాయి లేదా వాటిపై ఆందోళనలు రావడానికి కారణాలేంటి అంటే..
350 కోట్ల మంది వినియోగదారులు ఉండటం వల్ల, హ్యాకర్లకు ఇదొక పెద్ద లక్ష్యం. ఎంత చిన్న లోపం దొరికినా, అది కోట్ల మందిపై ప్రభావం చూపుతుంది.

వాట్సాప్(WhatsApp) ఎప్పటికప్పుడు ఫీచర్లను జోడిస్తూ, కోడ్‌ను అప్‌డేట్ చేస్తూ ఉంటుంది. కొత్త కోడ్‌లో అనుకోకుండా చిన్న చిన్న టెక్నికల్ లోపాలు (Bugs) తలెత్తే అవకాశం ఉంటుంది.
ప్రపంచవ్యాప్తంగా సైబర్ నేరగాళ్లు, గూఢచర్య సంస్థలు నిరంతరం ఈ భద్రతా వ్యవస్థలను ఛేదించడానికి ప్రయత్నిస్తూనే ఉంటాయి. ఇది శాశ్వత యుద్ధం లాంటిది. కాంటాక్ట్ నంబర్స్, పర్సనల్ డేటా మార్కెట్‌లో అత్యంత విలువైనవి కావడంతో, వాటిని దొంగిలించడానికి ప్రయత్నాలు ఎక్కువయ్యాయి.

అధికారికంగా ధృవీకరించని సమాచారాన్ని నమ్మకుండా, వినియోగదారులు తమ భద్రతను పెంపొందించుకోవడానికి ఈ కింది జాగ్రత్తలు తీసుకోవాలని సైబర్ నిపుణులు సూచిస్తున్నారు:

తమ స్మార్ట్‌ఫోన్‌లో , వాట్సాప్‌లో తాజా అప్‌డేట్‌లు ఎప్పటికప్పుడు ఇన్‌స్టాల్ చేసుకోవాలి. ఈ అప్‌డేట్‌లు సాధారణంగా గుర్తించిన భద్రతా లోపాలను సరిచేస్తాయి.

టూ-స్టెప్ వెరిఫికేషన్ (Two-Step Verification).. వాట్సాప్‌లో టూ-స్టెప్ వెరిఫికేషన్‌ను తప్పనిసరిగా ఆన్ చేసుకోవాలి. ఇది మీ ఫోన్ పోయినా లేదా సిమ్ కార్డ్ దొంగిలించబడినా అకౌంట్‌ను సురక్షితంగా ఉంచుతుంది.

ప్రైవసీ సెట్టింగ్‌లు.. సెట్టింగ్స్‌లో ప్రైవసీ ఆప్షన్లను (ప్రొఫైల్ ఫోటో, లాస్ట్ సీన్, స్టేటస్) ‘My Contacts’ లేదా ‘Nobody’ కి మార్చుకోవడం మంచిది.

అనుమతులపై దృష్టి.. తెలియని యాప్స్‌కు కాంటాక్ట్‌లు, మీడియా వంటి అనుమతులను ఇవ్వకపోవడం.

ఫిషింగ్ హెచ్చరికలు.. గుర్తు తెలియని నంబర్ల నుంచి వచ్చే లింకులు లేదా ఫైళ్లను అస్సలు తెరవకూడదు.

వాట్సాప్(WhatsApp) యొక్క అంతర్లీన భద్రతా వ్యవస్థ (E2EE) చాలా పటిష్టంగా ఉన్నా కూడా, వినియోగదారులు వ్యక్తిగత జాగ్రత్తలు తీసుకోవడం అత్యంత ముఖ్యం. అధికారిక ప్రకటనల కోసం వేచి చూడటం , నిత్యం భద్రతా చర్యలు తీసుకోవడం ద్వారా మాత్రమే ఈ సైబర్ బెదిరింపులను సమర్థవంతంగా ఎదుర్కోవచ్చు.

USA: అమెరికాలో మహిళ హత్య..  8 ఏళ్ల తర్వాత దొరికిన నిందితుడు