India-Jordan: భారత్ ,జోర్డాన్ స్నేహంలో కొత్త చరిత్ర.. 5 కీలక ఒప్పందాలపై సంతకాలు

India-Jordan

భారత ప్రధాని నరేంద్ర మోదీ పశ్చిమ ఆసియా దేశాల(India-Jordan) పర్యటనలో భాగంగా ప్రస్తుతం జోర్డాన్ రాజధాని అమ్మాన్‌లో ఉన్నారు. డిసెంబర్ 15 నుంచి 18 వరకు సాగే ఈ మూడు దేశాల పర్యటనలో జోర్డాన్ మొదటిది. భారత్ , జోర్డాన్ దేశాల మధ్య దౌత్య సంబంధాలు మొదలై 75 ఏళ్లు పూర్తయిన సందర్భంగా ఈ పర్యటనకు ఎంతో ప్రాధాన్యత ఉంది. జోర్డాన్ రాజు అబ్దుల్లా II తో మోదీ జరిపిన చర్చలు రెండు దేశాల మధ్య ఆర్థిక, రక్షణ , సాంస్కృతిక సంబంధాలను మరో మెట్టు ఎక్కించాయి.

ప్రధాని మోదీ , కింగ్ అబ్దుల్లా మధ్య జరిగిన చర్చల్లో ప్రధానంగా వెస్ట్ ఏషియాలో నెలకొన్న ప్రస్తుత పరిస్థితులపై లోతైన విశ్లేషణ జరిగింది. ముఖ్యంగా ఇజ్రాయెల్ , గాజా మధ్య జరుగుతున్న ఘర్షణల తర్వాతి పరిణామాలు, ప్రాంతీయ స్థిరత్వం గురించి ఇద్దరు నాయకులు చర్చించుకున్నారు.

ఉగ్రవాదం విషయంలో రెండు దేశాలు సున్నా సహనం (జీరో టోలరెన్స్) పాటించాలని నిర్ణయించుకున్నాయి. ఆన్‌లైన్ ద్వారా యువత పెడదారి పట్టకుండా చూడటం, ఇంటెలిజెన్స్ సమాచారాన్ని పంచుకోవడం, ఉగ్రవాద వ్యతిరేక శిక్షణలో ఒకరికొకరు సహకరించుకోవాలని అంగీకరించారు.

ప్రస్తుతం భారత్ , జోర్డాన్ (India-Jordan)మధ్య ద్వైపాక్షిక వాణిజ్యం 2.5 బిలియన్ డాలర్లుగా ఉంది. దీనిని రాబోయే ఐదేళ్లలో 5 బిలియన్ డాలర్లకు అంటే రెట్టింపు చేయాలని రెండు దేశాల నాయకులు లక్ష్యంగా పెట్టుకున్నారు. అమ్మాన్‌లో జరిగిన బిజినెస్ ఫోరంలో మోదీ మాట్లాడుతూ, జోర్డాన్ దేశాన్ని పశ్చిమ ఆసియాకు ముఖద్వారంగా ఉపయోగించుకుని భారతీయ కంపెనీలు తమ వ్యాపారాలను విస్తరించాలని పిలుపునిచ్చారు. ఫెర్టిలైజర్స్, రిన్యూవబుల్ ఎనర్జీ, ఇన్ ఫ్రాస్ట్రక్చర్ రంగాల్లో ఉమ్మడి ప్రాజెక్టులను చేపట్టేందుకు సిద్ధంగా ఉన్నట్లు తెలిపారు.

ఈ పర్యటనలో భాగంగా రెండు దేశాల(India-Jordan) మధ్య ఐదు అతి ముఖ్యమైన ఒప్పందాలు కుదిరాయి.

మొదటిది, కొత్త , పునరుత్పాదక ఇంధన రంగంలో ఒప్పందం. సౌర శక్తి, గాలి మళ్లించి విద్యుత్ తయారు చేయడం , గ్రీన్ హైడ్రోజన్ వంటి ప్రాజెక్టుల్లో సాంకేతిక సహకారం కోసం ఈ ఒప్పందం కుదిరింది. జోర్డాన్ అంతర్జాతీయ సోలార్ అలయన్స్‌లో మరింత చురుగ్గా పాల్గొనేలా ఇది దోహదపడుతుంది.

రెండవది, నీటి వనరుల నిర్వహణపై ఒప్పందం. జోర్డాన్ నీటి కొరత ఉన్న దేశం కావడంతో, భారతదేశం చేపట్టిన జల్ జీవన్ మిషన్ నదుల అనుసంధానం వంటి అనుభవాలను వారితో పంచుకోనున్నారు. నీటి పునరుద్ధరణ , స్మార్ట్ ఇరిగేషన్ పద్ధతులపై భారత్ సహాయం అందించనుంది.

మూడవది, ఎంతో ఆసక్తికరమైన పేట్రా , ఎల్లోరా గుహల మధ్య ట్విన్నింగ్ అగ్రిమెంట్. జోర్డాన్ లోని పురాతన నగరమైన పేట్రా మరియు భారతదేశంలోని ప్రపంచ ప్రసిద్ధ ఎల్లోరా గుహల మధ్య సాంస్కృతిక అనుసంధానం కోసం ఈ ఒప్పందం జరిగింది. దీనివల్ల పర్యాటక రంగం అభివృద్ధి చెందడమే కాకుండా, పురావస్తు పరిశోధనల్లో కూడా రెండు దేశాలు కలిసి పనిచేస్తాయి.

నాలుగవది, సాంస్కృతిక మార్పిడి కార్యక్రమం. 2025 నుండి 2029 వరకు కళాకారులు, విద్యార్థులు , విద్యావేత్తల మధ్య పరస్పర అవగాహన పెంచుకోవడానికి వీలుగా ఈ ఒప్పందాన్ని నవీకరించారు. దీనివల్ల రెండు దేశాల మధ్య సాంస్కృతిక వేడుకలు, స్కాలర్‌షిప్‌లు మరింతగా పెరుగుతాయి.

ఐదవది, డిజిటల్ సొల్యూషన్స్‌పై ఒప్పందం. భారతదేశం విజయవంతంగా అమలు చేస్తున్న ఆధార్, యూపీఐ (UPI) , కోవిన్ వంటి డిజిటల్ టెక్నాలజీలను జోర్డాన్‌లో కూడా ప్రవేశపెట్టేందుకు భారత్ సహకరించనుంది. దీనివల్ల జోర్డాన్ లో డిజిటల్ పేమెంట్స్ మరియు గవర్నెన్స్ మరింత సులభతరం కానున్నాయి.

ఈ పర్యటన కేవలం మూడు దేశాల పర్యటన మాత్రమే కాదు, ఇది ఇండియా యొక్క వెస్ట్ ఏషియా, ఆఫ్రికా వ్యూహంలో ఒక భాగం. ఆహార భద్రత, ఇంధన అవసరాలు , కొత్త సప్లై చైన్ ఏర్పాటులో భారత్ తన ముద్ర వేయాలని చూస్తోంది. ప్రధాని మోదీ స్వయంగా ట్విట్టర్ వేదికగా స్పందిస్తూ, ఈ ఒప్పందాలు రెండు దేశాల భాగస్వామ్యాన్ని మరింత అర్థవంతంగా మారుస్తాయని విశ్వాసం వ్యక్తం చేశారు.

మరిన్ని తాజా వార్తల కోసం ఇక్కడ క్లిక్ చేయండి