Rajya Sabha :24 రాజ్యసభ స్థానాలకు షెడ్యూల్ విడుదల..ఏపీ రాజకీయాల్లో వేడి పుట్టిస్తున్న 4 సీట్ల భర్తీ వ్యవహారం

Rajya Sabha

దేశవ్యాప్తంగా ఖాళీగా ఉన్న రాజ్యసభ స్థానాలకు.. కేంద్ర ఈసీ షెడ్యూల్ ప్రకటించడం ఇప్పుడు దేశ రాజకీయాల్లో ఒక రేంజ్‌లో ఉత్సుకత పెంచేసింది. దీని ప్రకారం మొత్తం 10 రాష్ట్రాల్లోని 24 రాజ్యసభ స్థానాలకు జూన్ 18న పోలింగ్ జరగనుంది. ఓటింగ్ ముగిసిన వెంటనే సేమ్ డే సాయంత్రం రిజల్ట్స్ కూడా వచ్చేస్తాయి. ఈ 24 సీట్లలో ఆంధ్రప్రదేశ్‌కు చెందిన నాలుగు స్థానాలు కూడా ఉండటం వల్ల ఇప్పుడు అందరి దృష్టి ఏపీ రాజకీయాల మీదే పడింది.

సాధారణంగా రాజ్యసభ(Rajya Sabha) ఎన్నికలంటే సామాన్య ప్రజలు నేరుగా ఓటు వేసేవి కావు. మన ప్రాంతాల నుంచి గెలిపించిన ఎమ్మెల్యేలు ఈ ఎన్నికల్లో ఓటర్లుగా ఉంటారు. అందుకే అసెంబ్లీలో ఏ పార్టీకి చెందిన ఎంత మంది ఎమ్మెల్యేలు ఉన్నారో.. ఆ ఎమ్మెల్యేల లెక్కే ఇక్కడ గెలుపోటములను డిసైడ్ చేస్తుంది. దీని వల్లే ఈ ఎన్నికలు పైకి సైలెంట్‌గా కనిపిస్తున్నా కూడా లోపల మాత్రం పార్టీల మధ్య గట్టి పొలిటికల్ వార్ నడుస్తూ ఉంటుంది.

కేంద్ర ఎన్నికల కమిషన్ ఇచ్చిన షెడ్యూల్ ప్రకారం జూన్ 1న ఈ ఎలక్షన్స్‌కు సంబంధించిన అఫీషియల్ నోటిఫికేషన్ వస్తుంది. ఆ రోజు నుంచే నామినేషన్ల పర్వం మొదలవుతుంది. జూన్ 8 వ తారీఖు వరకు నామినేషన్లు వేయడానికి లాస్ట్ డేట్ కాగా, జూన్ 9న వాటిని స్క్రూటినీ చేస్తారు. ఒకవేళ ఎవరైనా పోటీ నుంచి తప్పుకోవాలి అనుకుంటే జూన్ 11 లోపు తమ నామినేషన్లను వెనక్కి తీసుకోవచ్చు.

ఆ తర్వాత జూన్ 18న ఉదయం నుంచి సాయంత్రం వరకు ఎమ్మెల్యేలంతా ఓట్లు వేస్తారు. అదే రోజు సాయంత్రం 5 గంటల నుంచి కౌంటింగ్ స్టార్ట్ చేసి రిజల్ట్‌ను ప్రకటిస్తారు. ఈ షెడ్యూల్ ఏపీతో పాటు గుజరాత్, కర్ణాటక, రాజస్థాన్, మధ్యప్రదేశ్, జార్ఖండ్, మణిపూర్, మేఘాలయ, అరుణాచల్ ప్రదేశ్, మిజోరం లాంటి రాష్ట్రాలకు కూడా వర్తిస్తుంది.

ఏపీలో ఒకేసారి నాలుగు సీట్లు ఖాళీ కావడమనేది ఇక్కడి పార్టీలకు చాలా కీలకంగా మారుతోంది. ఎందుకంటే ఈ నాలుగు సీట్లను గెలుచుకోవాలంటే అసెంబ్లీలో వారికి అంత గట్టి సంఖ్యాబలం ఉండాలి. అధికారంలో ఉన్న పార్టీకి ఆ ఎమ్మెల్యేల సపోర్ట్ ఫుల్‌గా ఉంటే రాజ్యసభ సీట్లను సొంతం చేసుకోవడం చాలా సులభం అవుతుంది. ఈ నాలుగు సీట్లు ఏ పార్టీ అకౌంట్‌లోకి వెళ్తాయనే దాన్ని బట్టి రాష్ట్రంలో ఆ పార్టీ పట్టు ఎంత బలంగా ఉందో అందరికీ అర్థమైపోతుంది. అందుకే ఏపీలో ఈ రాజ్యసభ సీట్ల భర్తీ ఎప్పుడూ కూడా పెద్ద హాట్ టాపిక్‌గానే మారుతుంది.

నిజానికి మన రాజ్యాంగం ప్రకారం చూస్తే.. రాజ్యసభ(Rajya Sabha) అనేది ఎప్పటికీ రద్దవని ఒక శాశ్వత సభగా భావిస్తారు. కాకపోతే ప్రతి రెండేళ్లకోసారి అందులోని సభ్యులలో మూడో వంతు మంది పదవీకాలం ముగుస్తుంది. అలా ఖాళీలు ఏర్పడిన ప్రతీసారి కూడా ఈసీ కొత్త షెడ్యూల్ ఇచ్చి ఆ సీట్లను భర్తీ చేస్తుంది. కాగా ఏపీలో ఈసారి వచ్చే పొలిటికల్ సమీకరణాలు ఎప్పటికప్పుడు కొత్తగా ఉంటూ ఆసక్తి రేపుతున్నాయి..

పార్లమెంటులో లోక్‌సభను దిగువ సభ అని రాజ్యసభను(Rajya Sabha) ఎగువ సభ అని అంటారు. కేంద్ర ప్రభుత్వం ఏ కొత్త చట్టాలు తీసుకురావాలన్నా, బిల్లులు పాస్ చేయాలన్నా సరే రాజ్యసభ ఆమోదం కచ్చితంగా ఉండాలి. లోక్‌సభలో ఎంత మెజారిటీ ఉన్నా కూడా.. రాజ్యసభలో కనుక మద్దతు లేకపోతే కీలకమైన బిల్లులు అక్కడే ఆగిపోయే పరిస్థితి వస్తుంది. అందుకే ఢిల్లీ రాజకీయాల్లో రాజ్యసభలోని ఒక్కో సీటుకు అంత వాల్యూ ఉంటుంది. రాష్ట్రం నుంచి వెళ్లే సభ్యులే అక్కడ కేంద్ర ప్రభుత్వం దగ్గర రాష్ట్ర హక్కుల గురించి, ప్రత్యేక ప్యాకేజీలు, నిధుల గురించి గట్టిగా మాట్లాడతారు.

ఇలాంటి పెద్దల సభకు పంపించే అభ్యర్థులను ఎన్నుకునేటప్పుడు పార్టీలు చాలా రకాల లెక్కలు వేసుకుంటాయి. సాధారణంగా తమ పార్టీలోని సీనియర్ లీడర్లు, నమ్మకస్తులు, చట్టాలపైన మంచి అవగాహన ఉన్నవాళ్లకే ఎక్కువ ప్రాధాన్యం ఇస్తాయి. దీనితో పాటు కుల సమీకరణాలు, ప్రాంతాల బ్యాలెన్స్, మిత్రపక్షాల సర్దుబాట్లు కూడా ఈ సీట్ల ఎంపికలో మెయిన్ రోల్ ప్లే చేస్తాయి. ఎవరిని అభ్యర్థిగా నిలబెడుతున్నారనే దాన్ని బట్టి కూడా పార్టీలు బయట సమాజానికి ఒక పొలిటికల్‌గా సమాధానం ఇచ్చినట్లు అవుతుంది.

ఈ ఎలక్షన్‌ ఫలితాలు అటు రాష్ట్రంలోనూ, ఇటు కేంద్రంలోనూ ఒకేసారి ప్రభావాన్ని చూపిస్తాయి. ఏపీలోని నాలుగు స్థానాలు గనుక అధికార కూటమి పార్టీ క్లీన్ స్వీప్ చేస్తే.. అసెంబ్లీలో తమకున్న తిరుగులేని బలాన్ని మరోసారి ప్రూవ్ చేసుకున్నట్లు అవుతుంది. ప్రతిపక్షాలకు సీట్లు గెలిచే అవకాశం లేకపోయినా, తమ ఉనికిని చాటుకోవడానికి ఈ ఎన్నికలను పక్కాగా ఒక వేదికగా వాడుకుంటాయి.

ప్రజలకు ఇందులో ఓటు వేసే ఛాన్స్ లేకపోయినా, పరోక్షంగా ఎంతో మేలు జరుగుతుంది. ఎందుకంటే ప్రజల తరఫున రాజ్యసభ(Rajya Sabha)కు వెళ్లే ఎంపీలు ఎంత సమర్థులైతే.. కేంద్రం నుంచి రాష్ట్రానికి వచ్చే ప్రాజెక్టులు, నిధులు అంత బాగా వస్తాయి. ఏపీ ప్రయోజనాల కోసం, ప్రజా సమస్యలపై ఢిల్లీ వేదికగా తమ గొంతు వినిపించే ఆ నలుగురు నేతలు ఎవరవుతారా అని ఇప్పుడు తెలుగు రాష్ట్రాల్లో అందరూ తెగ ఆసక్తి చూపిస్తున్నారు.

Gold Price : పుత్తడి తగ్గినా వెండి మాత్రం తగ్గనంటోంది.. ఒక్కరోజే కిలోపై రూ. 5,000 జంప్