Cyclone: బంగాళాఖాతంలో వాయుగుండం..ఏపీ , తెలంగాణకు అలర్ట్

Cyclone

బంగాళాఖాతంలో ఏర్పడిన వాయుగుండం కారణంగా ఆంధ్రప్రదేశ్‌కు భారీ వర్షాల ముప్పు పొంచి ఉంది. ఆగస్టు 19న దక్షిణ ఒడిశా తీరం దాటిన ఈ వాయుగుండం, ఉత్తరాంధ్రవైపు కదులుతున్నట్లు విపత్తుల నిర్వహణ సంస్థ తెలిపింది. ఈ వాయుగుండం ప్రభావంతో తీరం వెంబడి 35 నుంచి 45 కిలోమీటర్ల వేగంతో ఈదురు గాలులు వీచే అవకాశం ఉందని వాతావరణ శాఖ హెచ్చరిస్తోంది.దీంతో మత్స్యకారులు వేటకు వెళ్లకూడదని అధికారులు సూచిస్తున్నారు.

వాయుగుండం ప్రభావం ముఖ్యంగా ఉత్తరాంధ్ర జిల్లాలైన శ్రీకాకుళం, విజయనగరం, తూర్పుగోదావరి, పశ్చిమగోదావరిపై ఎక్కువగా ఉంటుందని అధికారులు అంచనా వేస్తున్నారు. ఈ ప్రాంతాల్లో భారీ నుంచి అతి భారీ వర్షాలు కురిసే అవకాశం ఉంది. నదీ పరీవాహక ప్రాంతాల్లో నివసించే ప్రజలు అప్రమత్తంగా ఉండాలని, వర్ష పరిస్థితులను బట్టి ప్రయాణాలు వాయిదా వేసుకోవాలని సూచిస్తున్నారు.

విపత్తును ఎదుర్కోవడానికి అధికారులు ఇప్పటికే సన్నద్ధమయ్యారు. ముఖ్యంగా శ్రీకాకుళం జిల్లా కలెక్టర్ ఆధ్వర్యంలో ఒక కంట్రోల్ రూమ్ (నెం. 08942-240557) ఏర్పాటు చేశారు. ప్రజల భద్రతను దృష్టిలో ఉంచుకుని ప్రభుత్వ, ప్రైవేటు పాఠశాలలకు, అంగన్వాడీ కేంద్రాలకు సెలవులు ప్రకటించారు.

భవిష్యత్తులో వాయుగుండం (Cyclone)మరింత బలపడితే, వరదలు, ఆస్తి నష్టాలు సంభవించే ప్రమాదం ఉంది. ఈ పరిస్థితులను సమర్థవంతంగా ఎదుర్కోవడానికి ప్రజల సహకారం, ప్రభుత్వం, స్థానిక అధికారుల సమన్వయం చాలా అవసరం. సురక్షిత ప్రాంతాలకు వెళ్లడానికి ఆశ్రయ కేంద్రాలను కూడా ఏర్పాటు చేస్తున్నారు. ప్రజలు అధికారులు ఇచ్చే సూచనలను పాటించడం ద్వారా ప్రాణ నష్టాన్ని నివారించవచ్చు. ఈ విపత్కర పరిస్థితుల్లో అందరూ సురక్షితంగా ఉండేందుకు జాగ్రత్తలు తీసుకోవాలని విపత్తుల నిర్వహణ సంస్థ కోరుతోంది.

మరోవైపు తెలంగాణ(Telangana) రాష్ట్రంపై ఈ వాయుగుండం ప్రభావం తక్కువగా ఉండనుంది. వాయుగుండం కదలిక వల్ల పశ్చిమ, తూర్పు గాలులు ఏర్పడటం కారణంగా రాష్ట్రంలోని కొన్ని ప్రాంతాల్లో తేలికపాటి నుంచి మోస్తరు వర్షాలు కురవవచ్చని వాతావరణ శాఖ అంచనా వేసింది. పెద్ద ఎత్తున వరదలు లేదా ఇతర సమస్యలు ఏర్పడే అవకాశాలు తక్కువగా ఉన్నప్పటికీ, కొన్ని ప్రాంతాల్లో మాత్రం స్థానికంగా వర్షాలు పడవచ్చు.

Also read: Komarambhim: కొమరంభీమ్,ఖమ్మం జిల్లాలలో అద్భుతం..న్యూజిలాండ్‌ నుంచి వచ్చిన అతిథులు