Jr. NTR : యాడ్ షూటింగ్‌లో జూనియర్ ఎన్టీఆర్‌కు గాయం.. అభిమానులలో ఆందోళన

Jr. NTR

టాలీవుడ్ అగ్ర నటుడు జూనియర్ ఎన్టీఆర్ ఓ యాడ్ షూటింగ్‌లో స్వల్పంగా గాయపడ్డారన్న వార్త అభిమానులను ఆందోళనకు గురిచేసింది. హైదరాబాద్‌లో జరిగిన ఈ సంఘటనలో, ఎన్టీఆర్ ఒక యాక్షన్ సీన్ చిత్రీకరిస్తున్న సమయంలో అనుకోకుండా ఈ ప్రమాదం జరిగింది. వెంటనే అప్రమత్తమైన వైద్య బృందం ఆయనకు ప్రథమ చికిత్స అందించింది. ఈ ఘటన తర్వాత ఎన్టీఆర్ ఆరోగ్య పరిస్థితి నిలకడగానే ఉందని, అభిమానులు ఆందోళన చెందాల్సిన అవసరం లేదని ఆయన టీమ్ ఒక అధికారిక ప్రకటనలో తెలియజేసింది.

ఈ గాయం నుంచి పూర్తిగా కోలుకోవడానికి వైద్యుల సూచన మేరకు ఎన్టీఆర్(Jr. NTR) రెండు వారాల పాటు విశ్రాంతి తీసుకోవాలని నిర్ణయించుకున్నారు. ఈ కారణంగా, ప్రస్తుతం ఆయనకు సంబంధించిన అన్ని షూటింగ్‌లు, కసరత్తులు తాత్కాలికంగా వాయిదా పడ్డాయి. ఈ వార్త తెలిసిన వెంటనే పలువురు సినీ ప్రముఖులు, అభిమానులు ఎన్టీఆర్‌కు ఫోన్ చేసి, క్షేమ సమాచారం తెలుసుకున్నారు.

ఎన్టీఆర్(Jr. NTR) ఇటీవలే బాలీవుడ్ చిత్రం “వార్ 2“తో ప్రేక్షకుల ముందుకు వచ్చారు. ఈ సినిమాలో హృతిక్ రోషన్‌తో కలిసి ఆయన అద్భుతమైన నటన కనబరిచి మంచి మార్కులు కొట్టేశారు. ప్రస్తుతం ఆయన తన తదుపరి చిత్రం కోసం సన్నాహాలు చేసుకుంటున్నారు. ప్రశాంత్ నీల్ దర్శకత్వంలో రూపొందనున్న “డ్రాగన్” సినిమా కోసం ఆయన ప్రత్యేకంగా కసరత్తులు చేస్తున్నారు. ఇటీవల ఆయన జిమ్‌లో చెమటోడుస్తున్న వీడియోలు కూడా సామాజిక మాధ్యమాల్లో వైరల్ అయ్యాయి. ఈ తాజా గాయం వల్ల ‘డ్రాగన్’ సినిమా షూటింగ్ ప్రణాళికలో స్వల్ప మార్పులు ఉండే అవకాశం ఉందని సినీ వర్గాలు అంచనా వేస్తున్నాయి.

ఎన్టీఆర్(Jr. NTR) టీమ్ విడుదల చేసిన ప్రకటనలో, అభిమానులు, మీడియా, మరియు ప్రజలు ఎటువంటి ఊహాగానాలు, అవాస్తవ సమాచారాన్ని వ్యాప్తి చేయవద్దని కోరింది. తారక్ త్వరగా కోలుకొని మళ్లీ కెమెరా ముందుకు రావాలని అభిమానులు ఆకాంక్షిస్తున్నారు.

CBI:సీబీఐకి ఫోన్ ట్యాపింగ్ కేసు.. తెలంగాణ రాజకీయాల నుంచి న్యాయవ్యవస్థ వరకూ