America :అమెరికాకు పోస్టల్ సేవలు బంద్..కొత్త టెన్షన్ ఎందుకు?

America

భారత్, అమెరికాల మధ్య పోస్టల్ సేవలు తాత్కాలికంగా నిలిచిపోవడం ఇప్పుడు భారతీయులందరినీ కలవరపెడుతోంది. ఇది వేలాది మంది వ్యాపారులు, విద్యార్థులు, అలాగే విదేశాల్లో ఉన్న భారతీయ కుటుంబాలపై తీవ్ర ప్రభావం చూపిస్తోంది. ముఖ్యంగా, భారత్ నుంచి అమెరికాకు డాక్యుమెంట్లు, పార్సెల్స్, గిఫ్ట్‌లు పంపించేవారికి ఒక పెద్ద సమస్యగా మారనుంది. ఈ పరిస్థితి ఎందుకు వచ్చింది? దీని వెనుక ఉన్న కారణాలు ఏంటి? అలాగే దీనివల్ల ఎవరెవరు ప్రభావితమవుతున్నారు? అంటూ చర్చ సాగుతోంది.

ఈ పోస్టల్ సేవల నిలుపుదలకు ప్రధాన కారణం అమెరికా(America )ప్రభుత్వం ఇటీవల తీసుకువచ్చిన కొత్త కస్టమ్స్, టారిఫ్ నిబంధనలే. ఆగస్టు 29 నుంచి అమల్లోకి రానున్న ఈ కొత్త నిబంధనల ప్రకారం, ఇంతకుముందు $800 లోపు ఉండే వస్తువులకు ఉన్న ‘డ్యూటీ ఫ్రీ’ మినహాయింపును తొలగించారు. ఇప్పుడు చిన్న చిన్న పార్సెల్స్‌పై కూడా కస్టమ్స్ డ్యూటీ విధించబడుతుంది. అయితే, $100 లోపు ఉన్న బహుమతి పార్సెల్స్‌కు మాత్రమే ఈ మినహాయింపు కొనసాగుతుంది.

ఈ కొత్త నిబంధనల అమలులో ఇంకా స్పష్టత లేకపోవడమే అసలు సమస్య. కస్టమ్స్ డ్యూటీని ఎలా వసూలు చేయాలి, ఎవరిపై, ఎంత మొత్తంలో వేయాలి, వసూలు చేసిన మొత్తాన్ని ఎలా చెల్లించాలి వంటి ముఖ్యమైన అంశాలపై అమెరికా కస్టమ్స్ అండ్ బోర్డర్ ప్రొటెక్షన్ (CBP) సరైన మార్గదర్శకాలను ఇంకా ఇవ్వలేదు.
దీనితో, ఎయిర్ కార్గో క్యారియర్లు, షిప్పింగ్ కంపెనీలు భారత్ నుంచి వచ్చే కన్సైన్‌మెంట్లను తీసుకోవడానికి నిరాకరిస్తున్నాయి. ఈ సాంకేతిక, ఆపరేషనల్ సమస్యల వల్ల, ఇండియా పోస్ట్ ఆగస్టు 25 నుంచి అమెరికాకు పోస్టల్ సేవలను తాత్కాలికంగా నిలిపివేసింది.

ఈ నిర్ణయం వల్ల చిన్న వ్యాపారులు ఇ-కామర్స్ సంస్థలకు నష్టం జరగనుంది. చేతివృత్తుల వస్తువులు, ఫ్యాషన్ ఉత్పత్తులు, ఇతర చిన్న వస్తువులను అమెరికాకు ఎగుమతి చేసే చిన్న వ్యాపారాలు, స్టార్టప్‌లు తీవ్ర ఇబ్బందులు ఎదుర్కొంటాయి.

అలాగే చదువు కోసం అమెరికాలో ఉన్న విద్యార్థులు, అలాగే అక్కడ నివసిస్తున్న భారతీయ డయాస్పోరా తమ కుటుంబాలకు డాక్యుమెంట్లు, గిఫ్ట్‌లు, అత్యవసర వస్తువులు పంపలేకపోతున్నారు. ఇది వారి మధ్య సంబంధాలను కూడా ప్రభావితం చేస్తోంది.అలాగే ముఖ్యంగా మందులు, పుస్తకాలు వంటి అత్యవసర వస్తువులు పంపేవారు ప్రత్యామ్నాయ మార్గాల కోసం వెతకాల్సిన పనిలో ఉన్నారు

ప్రస్తుతానికి, కేవలం తక్కువ విలువైన ($100 లోపల) బహుమతి పార్సెల్స్ , డాక్యుమెంట్లు మాత్రమే పంపడానికి అవకాశం ఉంది, అది కూడా పూర్తి డాక్యుమెంటేషన్ ఉంటేనే.

అయితే ఇది కేవలం ఒక తాత్కాలిక సమస్య అని నిపుణులు చెబుతున్నారు. ఈ సమస్యను పరిష్కరించడానికి ఇండియా పోస్ట్, అమెరికాలోని USPS (United States Postal Service) రెండు ప్రభుత్వాలు కలిసి పనిచేస్తున్నాయని ప్రకటించాయి. డ్యూటీ కలెక్షన్ , రెమిటెన్స్ మార్గదర్శకాలపై పూర్తి స్పష్టత వచ్చిన తర్వాత, పోస్టల్ సేవలు తిరిగి ప్రారంభమయ్యే అవకాశం ఉంది.

ఈ నిలుపుదల రెండు దేశాల మధ్య వాణిజ్య సంబంధాలకు ఒక తాత్కాలిక ఎదురుదెబ్బ మాత్రమే అని వాణిజ్య నిపుణులు అభిప్రాయపడుతున్నారు. త్వరలో రెండు దేశాల పరస్పర ప్రయోజనాలకు అనుగుణంగా ఒక పరిష్కారం లభిస్తుందని వారు ఆశాభావం వ్యక్తం చేస్తున్నారు. పూర్తిస్థాయి విధాన మార్గదర్శకాలు వచ్చే వరకు ఈ నిలుపుదల కొనసాగుతుంది.
అయితే, వచ్చే కొన్ని వారాల్లో ఈ విషయంలో గణనీయమైన మార్పులు వచ్చే అవకాశం ఉందని విశ్లేషకులు అంచనా వేస్తున్నారు. ఈలోపు, ప్రజలు ప్రైవేట్ కొరియర్ సర్వీసులను ఉపయోగించాల్సి వస్తుంది.