Devi Navratri:దేవీ నవరాత్రులు.. అమ్మ అనుగ్రహం కోసం చేయాల్సినవి, చేయకూడనివి

Devi Navratri

సెప్టెంబర్ 22, 2025 నుంచి అక్టోబర్ 1, 2025 వరకు శారదీయ నవరాత్రులు(Devi Navratri) ప్రారంభం కానున్నాయి. ఈ పండుగ కేవలం ఒక ఆచారం మాత్రమే కాదు, ఇది మనలోని చెడుపై మంచి సాధించిన విజయాన్ని సూచించే ఒక మహత్తరమైన ఆధ్యాత్మిక యాత్ర. ఈ పవిత్రమైన రోజుల్లో దుర్గామాతను పూజించడం ద్వారా భక్తులు ఆనందం, శ్రేయస్సు, అపారమైన శక్తులను పొందుతారని ప్రగాఢంగా విశ్వసిస్తారు. అమ్మవారి అనుగ్రహం పొందాలంటే ఈ తొమ్మిది రోజుల్లో కొన్ని ప్రత్యేక నియమాలను, ఆచారాలను పాటించడం చాలా ముఖ్యం.

నవరాత్రుల(Devi Navratri) మొదటి రోజున, శుభ సమయంలో కలశ స్థాపన చేయడం ద్వారా నవ దుర్గలను ఇంట్లోకి ఆహ్వానించినట్లు భావిస్తారు. ఇది దేవీ ఆరాధనకు ఒక శుభ సూచకం. కలశం ప్రతిష్టించిన తర్వాత, తొమ్మిది రోజుల పాటు దుర్గాదేవి యొక్క నవ రూపాలను నిష్టగా పూజించాలి.

నవరాత్రుల సమయంలో అఖండ జ్యోతిని వెలిగించడం చాలా శుభప్రదంగా భావిస్తారు. ఈ జ్యోతిని తొమ్మిది రోజుల పాటు ఆరిపోకుండా జాగ్రత్తగా చూసుకోవాలి. ఇది ఇంట్లో ఆనందం, శ్రేయస్సు, ఆశీస్సులను తెస్తుంది.

నవరాత్రు(Devi Navratri)లలో మనస్సు, శరీరం, పరిసరాలను శుభ్రంగా ఉంచుకోవడం చాలా ముఖ్యం. ఇంటిని, ముఖ్యంగా పూజా స్థలాన్ని పూర్తిగా శుభ్రం చేయాలి. ఇది మన చుట్టూ ఉన్న ప్రతికూల శక్తిని తొలగించి, సానుకూల శక్తిని ఆహ్వానిస్తుంది.ఉపవాసం ఉన్నవారు సాత్విక ఆహారాన్ని మాత్రమే తీసుకోవాలి. పండ్లు, పాలు, కొన్ని రకాల పిండి పదార్థాలను మాత్రమే ఆహారంగా తీసుకోవడం ద్వారా శరీరం మరియు మనస్సు తేలికగా ఉంటాయి.

ఈ తొమ్మిది రోజులు దుర్గాదేవికి సంబంధించిన మంత్రాలను జపించడం వల్ల మనసుకు ప్రశాంతత లభిస్తుంది. దుర్గా సప్తశతి పఠించడం వల్ల కోరుకున్న ఫలితాలు లభిస్తాయని నమ్ముతారు. దేవీ నవరాత్రులలో దానం చేయడం అత్యంత పుణ్యకార్యంగా భావిస్తారు. అవసరమైన వారికి ఆహారం, బట్టలు లేదా డబ్బు దానం చేయడం వల్ల అమ్మవారి అనుగ్రహం లభిస్తుంది.

నవరాత్రుల తొమ్మిది రోజులు తామసిక ఆహారాన్ని (మాంసం, ఉల్లి, వెల్లుల్లి) అస్సలు తీసుకోకూడదు. ఈ ఆహారాలు శరీరంలో, మనసులో బద్ధకం, మందకొడితనాన్ని కలిగిస్తాయి. దీనివల్ల పూజ, నిష్టకు ఆటంకం కలుగుతుంది.

ఈ తొమ్మిది రోజులు మద్యం, పొగాకు వినియోగం పూర్తిగా నిషేధించబడింది. ఇవి ఆరాధన యొక్క పవిత్రతకు భంగం కలిగిస్తాయి.అలాగే ఉపవాస సమయంలో తోలుతో చేసిన వస్తువులైన బెల్టులు, పర్సులు, బూట్లు, చెప్పులు వంటివి ఉపయోగించకూడదు. ఉపవాసం ఉన్నవారు పగటిపూట నిద్రపోకూడదు. ఇలా చేయడం వల్ల ఉపవాసం యొక్క ఫలితం ఉండదని నమ్ముతారు.

ఈ తొమ్మిది రోజుల్లో ఎవరినీ, ముఖ్యంగా స్త్రీలను , పెద్దలను అగౌరవపరచకూడదు. దుర్గాదేవి స్త్రీ శక్తికి ప్రతీక కనుక, మహిళలను గౌరవించడం ఆమెను పూజించినట్లే.ఈ తొమ్మిది రోజుల పాటు అమ్మవారిని నిష్టగా ఆరాధిస్తే, జీవితంలో సంతోషం, శ్రేయస్సు మరియు విజయాలు లభిస్తాయని నమ్మకం.

Black holes: విశ్వంలో అత్యంత రహస్యమైన ప్రదేశం బ్లాక్ హోల్స్.. ఎందుకో తెలుసా?