Smartphones: పాత స్మార్ట్‌ఫోన్‌లు అంత ప్రమాదకరమా? ఈ సమస్యలు తప్పవా?

Smartphones

చాలామంది సెంటిమెంటుగానో, లేదంటే పొదుపు కోసమే ఫోన్ ఎంత పాతది అయినా కూడా పక్కన పెట్టకుండా వాడుతూ ఉంటారు. అయితే పాత స్మార్ట్‌ఫోన్‌లు(Smartphones) వాడటం వల్ల ఆర్థికంగా కొంత ఉపశమనం లభించినా కూడా, వాటితో కొన్ని తీవ్రమైన భద్రతాపరమైన సమస్యలు వచ్చే ప్రమాదం ఉంది. కొత్త మోడళ్లకు లాగా ఈ పాత ఫోన్‌లకు తయారీ కంపెనీలు సాఫ్ట్‌వేర్, సెక్యూరిటీ అప్‌డేట్స్ ఇవ్వడం నిలిపివేస్తాయి. దీనివల్ల ఫోన్‌లో భద్రతా లోపాలు ఏర్పడతాయి.

ఈ లోపాలను ఉపయోగించుకుని హ్యాకర్లు సులభంగా మీ ఫోన్‌లోకి ప్రవేశించవచ్చు. ఫలితంగా మీ వ్యక్తిగత సమాచారం, బ్యాంకింగ్ వివరాలు, పాస్‌వర్డ్‌లు, మరియు ఫోటోలు వంటి డేటా చోరీకి గురయ్యే ప్రమాదం చాలా ఎక్కువగా ఉంటుంది. అంతేకాకుండా, పాత ఫోన్‌లలోని బ్యాటరీలు కాలక్రమేణా తమ సామర్థ్యాన్ని కోల్పోతాయి.

దీనివల్ల ఫోన్‌లు త్వరగా వేడెక్కడం లేదా బ్యాటరీ ఉబ్బిపోవడం వంటి సమస్యలు వస్తాయి. కొన్ని సందర్భాల్లో ఇది ఫోన్‌కు, మరియు దానిని వాడే వారికి ప్రమాదకరంగా మారవచ్చు. అంతేకాకుండా, పాత ఫోన్‌లలో హార్డ్‌వేర్ కొత్త యాప్స్, మరియు ఫీచర్లకు అనుకూలంగా ఉండదు. దీనివల్ల ఫోన్ పనితీరు తగ్గిపోయి, నెమ్మదిగా పనిచేస్తుంది. ఈ సమస్యలు మీకు చిరాకు కలిగించడమే కాకుండా, ముఖ్యమైన పనులను కూడా అడ్డుకుంటాయి.

ఈ ప్రమాదాల నుంచి తప్పించుకోవాలంటే కొన్ని జాగ్రత్తలు పాటించాలి. వీలైనంత వరకు ఆన్‌లైన్ బ్యాంకింగ్, లేదా ఆర్థిక లావాదేవీల కోసం పాత ఫోన్‌ను ఉపయోగించవద్దు. అలాగే, యాప్స్ డౌన్‌లోడ్ చేయడానికి అధికారిక యాప్ స్టోర్‌లను మాత్రమే వాడాలి. అపరిచిత వెబ్‌సైట్‌ల నుంచి లేదా అనధికారిక యాప్ స్టోర్ల నుంచి యాప్స్ డౌన్‌లోడ్ చేయకుండా జాగ్రత్తపడండి. మీ ఫోన్ భద్రతను పెంచుకోవడానికి మంచి యాంటీ-వైరస్ సాఫ్ట్‌వేర్ ఉపయోగించడం కూడా మంచి ఆలోచన. గుర్తుంచుకోండి, డబ్బు ఆదా చేసుకోవడం మంచిదే కానీ, మీ వ్యక్తిగత సమాచారం, భద్రతకు ప్రాముఖ్యత ఇవ్వడం చాలా ముఖ్యం.

మరిన్ని టెక్నాలజీ వార్తల కోసం ఇక్కడ క్లిక్ చేయండి.