Telangana Gram Panchayat Elections: ఏకగ్రీవాల పర్వం.. హామీల వర్షం.. తెలంగాణలో స్థానిక సంస్థల ఎన్నికల వేడి
Telangana Gram Panchayat Elections: ఎన్నికల్లో డబ్బు ఖర్చుపెట్టేబదులు ఆ డబ్బును ఏకగ్రీవంగా ఇచ్చి సర్పంచ్‌ కుర్చీ దక్కించుకునేందుకు చాలా మంది అభ్యర్థులు పావులు కదుపుతున్నారు.
Telangana Gram Panchayat Elections
తెలంగాణలో ఇప్పుడు ఎలక్షన్(Telangana Gram Panchayat Elections) ఫీవర్ నడుస్తోంది. ఇటీవలే జూబ్లీహిల్స్ ఉపఎన్నిక హడావుడి ముగిస్తే.. ఆ గెలుపు తెచ్చిన జోష్ తో స్థానిక సంస్థల ఎన్నికలకు ప్రభుత్వం రెడీ అయింది. నోటిఫికేషన్ వచ్చిన దగ్గర నుంచీ హడావుడి మామూలుగా లేదు. పల్లె ప్రాంతాలన్నీ సందడిగా కనిపిస్తున్నాయి. అయితే పోలింగ్ తేదీకి ముందే, నామినేషన్ల హడావుడి మధ్య ఏకగ్రీవాల దందా కొనసాగుతోంది.
ఎన్నికల్లో డబ్బు ఖర్చుపెట్టేబదులు ఆ డబ్బును ఏకగ్రీవంగా ఇచ్చి సర్పంచ్‌ కుర్చీ దక్కించుకునేందుకు చాలా మంది అభ్యర్థులు పావులు కదుపుతున్నారు. అటు గ్రామ పెద్దలు కూడా.. ఎన్నికల్లో అభ్యర్థులు విచ్చలవిడిగా డబ్బు ఖర్చు చేసే బదులు.. ఆ డబ్బునే ఏకగ్రీవం కోసం వెచ్చిస్తే ఊర్లో అభివృద్ధి పనులకు వినియోగించవచ్చని ప్రతిపాదిస్తూ జోరుగా చర్చలు జరుపుతున్నారు. ఫలితంగా ఏకగ్రీవాల కోసం నువ్వానేనా అన్నట్టుగా వేలంపాటలు సాగుతున్నాయి.
గద్వాల జిల్లా రూరల్‌ మండలం కొండపల్లి గ్రామంలో ఎవరైనా ఆలయ అభివృద్ధికి డబ్బులిస్తే వారే ఏకగ్రీవంగా సర్పంచ్‌ కావొచ్చునని ప్రకటించడంతో ఓ సీడ్‌ ఆర్గనైజర్‌ సై అన్నారు. ఆలయ అభివృద్ధికి 60 లక్షలు ఇస్తానని ఆయన ప్రకటించినట్లు తెలుస్తోంది. అయితే తాను తప్ప మరెవ్వరూ నామినేషన్‌ వేయకపోతేనే తాను ఆ డబ్బిస్తానని ఆయన షరతు పెట్టారు. ఇక కేటీదొడ్డి మండలం చింతలకుంట గ్రామంలో ఓ నాయకుడు 38 లక్షల 50 వేలు చెల్లిస్తానని చెప్పడంతో.. ఊర్లో వారంతా కొత్త సర్పంచ్‌గా ఆయనకే ముక్తకంఠంతో మద్దతు పలికినట్లు తెలుస్తోంది.
గట్టు మండలం గొర్లఖాన్‌ దొడ్డిలో సర్పంచ్‌ పదవి 53 లక్షలు, ఇదే మండలంలోని అంతపల్లి గ్రామంలో ఓ నాయకుడు 23 లక్షలు, మాందాపూర్‌లో సర్పంచ్‌ పదవి 10 లక్షల 75 వేలకు ఏకగ్రీవం అయినట్లు సమాచారం. ఇక ధరూర్‌ మండలం చిన్నపాడు, వామనపల్లి గ్రామాల్లో ఎవరైతే స్మశానానికి ఎకరం భూమి విరాళంగా ఇస్తారో వారే సర్పంచ్‌ అవుతారని చర్చలు చేస్తున్నారు.
సిద్దిపేట జిల్లా జగదేవ్‌పూర్‌ మండలంలోని బీజీ వెంకటాపూర్‌ సర్పంచ్‌ పదవి (Telangana Gram Panchayat Elections) కోసం ఐదుగురి మధ్య పోటాపోటీగా వేలం పాట సాగింది. ఒకరు 13 లక్షల 60 వేలకు పాడగా.. అంత ఇవ్వలేమంటూ మిగతా ఇద్దరు నామినేషన్లు వేసేందుకు మండల కార్యాలయానికి వెళ్లినట్టు తెలుస్తోంది.
ఖమ్మం జిల్లా నేలకొండపల్లి మండలం మూటాపురంలో.. రావెళ్ల కృష్ణారావు అనే అభ్యర్థి తనను సర్పంచ్‌గా గెలిపించినా, ఏకగ్రీవం చేసినా ఊరి కోసం ఏకంగా కోటి రూపాయలు ఖర్చు పెడతానంటూ మేనిఫెస్టో విడుదల చేశారు. ఇదిలా ఉంటే ఇష్టానుసారంగా జరుగుతున్న ఏకగ్రీవాలపై ఈసీ ఫోకస్‌ చేసింది.
గ్రామాల్లో వేలం ద్వారా లేదా బలవంతంగా ఏకగ్రీవాలపై దృష్టి సారించాలని అధికారులను ఆదేశించింది. వేలంపై ప్రత్యేక పర్యవేక్షణ విభాగాన్ని ఏర్పాటు చేయాలని కోరింది. వేలంలో బలవంతం, బెదిరింపులు, ప్రలోభపెట్టడం లాంటి చర్యల నివేదికలను ఎన్నికల అధికారులు రియల్‌ టైమ్‌లో రాతపూర్వకంగా ఫిర్యాదు చేయాలని పేర్కొంది.
మరిన్ని పొలిటికల్ వార్తల కోసం ఇక్కడ క్లిక్ చేయండి
