Kokapet lands:హైదరాబాద్‌లో రియల్ బూమ్ తగ్గలేదా? రికార్డ్ ధర పలికిన కోకాపేట భూములు ఏం చెబుతున్నాయి?

Kokapet lands

హైదరాబాద్ రియల్ ఎస్టేట్ మార్కెట్ మరోసారి వార్తల్లో నిలిచింది. HMDA నిర్వహించిన తాజా భూమి వేలంలో కోకాపేటలోని నియోపోలీస్ లేఅవుట్‌లో ఎకరం భూమి(Kokapet lands) ఏకంగా రూ.137.25 కోట్ల రికార్డు ధర పలికింది. ఇది ఒకవైపు నగరంలో రియల్ ఎస్టేట్ బూమ్ కొనసాగుతుందని సూచిస్తుంటే, మరోవైపు కొన్నాళ్లుగా హైదరాబాద్ మార్కెట్ మందగించిందనే వార్తలు బలంగా వినిపిస్తున్నాయి. దీంతో ఈ రెండు పరస్పర విరుద్ధ వాదనల్లో ఏది నిజం? సామాన్య కొనుగోలుదారుడి పరిస్థితి ఏమిటి? అన్న చర్చ జోరుగా నడుస్తోంది.

కోకాపేట(Kokapet lands), రాయదుర్గం వంటి ప్రాంతాలలో రికార్డు ధరలు పలకడానికి గల ప్రధాన కారణం ‘సాధారణ’ రియల్ ఎస్టేట్ మార్కెట్ కాదు, ఇది ‘అల్ట్రా-లగ్జరీ’ భూమి వేలం మార్కెట్ (Ultra-Luxury Land Auction Market) అవడమేనంటున్నారు విశ్లేషకులు.

కోకాపేట(Kokapet lands) నియోపోలీస్ ప్రాంతం ఫైనాన్షియల్ డిస్ట్రిక్ట్, నార్సింగి, గచ్చిబౌలి వంటి ముఖ్యమైన ఐటీ హబ్‌లకు అత్యంత దగ్గరగా ఉంది. ఔటర్ రింగ్ రోడ్డు (ORR)కు అతి సమీపంలో ఉండటంతో ట్రాన్స్‌పోర్ట్ ఈజీ అవుతుంది. అందుకే ఈ భూమి పరిమితం (Limited Supply)గా, పక్కా ప్రణాళికతో HMDA ద్వారా వేలం వేయబడుతుంది.

మరోవైపు వేలంలో భూమిని కొనుగోలు చేసేది సాధారణ గృహాలు నిర్మించే చిన్న డెవలపర్లు కాదు. అల్ట్రా-హై-నెట్-వర్త్ ఇండివిడ్యువల్స్ (HNIs) మరియు ఎన్నారైలు (NRIs) లక్ష్యంగా రూ.4 కోట్ల నుండి రూ.10 కోట్ల పైబడిన ధర కలిగిన లగ్జరీ అపార్ట్‌మెంట్లు, పెంటహౌస్‌లు, స్కై విల్లాలను నిర్మించే పెద్ద జాతీయ, అంతర్జాతీయ డెవలపర్ సంస్థలు మాత్రమే.

ఈ డెవలపర్లు హైదరాబాద్ భవిష్యత్తు ఆర్థిక వృద్ధిపై, ముఖ్యంగా ఐటీ రంగం విస్తరణపై, బలమైన నమ్మకంతో ఉన్నారు. ఈ భూమిని ఒక వ్యూహాత్మక పెట్టుబడిగా (Strategic Investment) చూస్తున్నారు. అందుకే ఎకరం కనీస ధర రూ.99 కోట్లుగా నిర్ణయించినా, పోటీ పడి రూ.137 కోట్లకు పైగా ధర చెల్లించారు.

ఇది కోకాపేట భూముల(Kokapet lands) రికార్డు ధరలు హైదరాబాద్‌లో లగ్జరీ రియల్ ఎస్టేట్ విభాగం (Luxury Segment) అత్యంత బలంగా, ఆరోగ్యంగా ఉందని స్పష్టం చేస్తున్నాయి.

అయితే’మార్కెట్ మందగమనం’ వాదన ఎందుకు వినిపిస్తోందంటే..మార్కెట్ మందగమనం అనే వాదన ప్రధానంగా సామాన్య/మధ్యతరగతి కొనుగోలుదారులు (Affordable and Mid-Segment Buyers) ఎక్కువగా ఉండే ప్రాంతాలు , గృహాల విభాగంలో కనిపిస్తోంది.

రెండేళ్లుగా రిజర్వ్ బ్యాంక్ ఆఫ్ ఇండియా (RBI) వడ్డీ రేట్లను పెంచడంతో, హోమ్ లోన్ EMIలు పెరిగాయి. రూ.50 లక్షల నుంచి రూ.1 కోటి వరకు లోన్ తీసుకునే మధ్యతరగతి కొనుగోలుదారులపై ఈ భారం ఎక్కువగా పడింది. దీంతో చాలా మంది కొనుగోలుదారులు తమ నిర్ణయాన్ని వాయిదా వేసుకుంటున్నారు.

సిమెంట్, స్టీల్, ఇసుక వంటి ముడి పదార్థాల ధరలు పెరగడంతో, ప్రాజెక్టుల నిర్మాణ వ్యయం (Construction Cost) పెరిగింది. ఈ భారాన్ని డెవలపర్లు తుది వినియోగదారులకు బదిలీ చేయడంతో, గృహాల ధరలు కూడా 15% నుంచి 30% వరకు పెరిగాయి.

గతంలో రూ.40 లక్షల లోపు లభించే సరసమైన గృహాల (Affordable Housing) సప్లై హైదరాబాద్‌లో గణనీయంగా పడిపోయింది. ఇప్పుడు మిడ్-సెగ్మెంట్ (రూ.45 లక్షల – రూ.1 కోటి) వాటా కూడా తగ్గుతూ, మార్కెట్ మొత్తం ప్రీమియం సెగ్మెంట్ (రూజ1.5 కోట్ల పైన) వైపు మొగ్గు చూపుతోంది.

అయితే హైదరాబాద్ రియల్ ఎస్టేట్ మార్కెట్ ఇప్పుడు రెండు వేర్వేరు వేగాలతో నడుస్తోంది.కోకాపేట, నార్సింగి, ఫైనాన్షియల్ డిస్ట్రిక్ట్ చుట్టూ ఉన్న పశ్చిమ ప్రాంతాలు. ఇక్కడ ధరలు నిరంతరం పెరుగుతున్నాయి.తూర్పు, ఉత్తర , పశ్చిమాన ORR వెలుపల ఉన్న ప్రాంతాలు. ఇక్కడ అమ్మకాలు స్థిరంగా ఉన్నా, వేగంగా పెరగడం లేదు.దీనిని బట్టి, మార్కెట్ పూర్తిగా పడిపోలేదు, కేవలం మందగించింది అన్న విషయం అర్ధం అవుతుంది.

మధ్యతరగతి లేదా సామాన్య కొనుగోలుదారులు హైదరాబాద్‌లో ఇల్లు కొనడం భవిష్యత్తులో మరింత కష్టమవుతుందనేది వాస్తవం. అయితే, సరైన వ్యూహాన్ని అనుసరిస్తే అవకాశాలు ఉన్నాయి. నగరం నుంచి 30-40 కి.మీ దూరంలో ఉన్న ప్రాంతాలపై దృష్టి పెట్టడం. ఉదాహరణకు, అవుటర్ రింగ్ రోడ్డుకు అవతలివైపున ఉన్న శంషాబాద్, ఆదిభట్ల (దక్షిణం/తూర్పు), శామీర్‌పేట (ఉత్తరం) వైపున ఇప్పటికీ సరసమైన ధరలలో ప్లాట్లు, అపార్ట్‌మెంట్లు అందుబాటులో ఉన్నాయి.

రాబోయే రీజినల్ రింగ్ రోడ్డు (RRR) చుట్టూ ఉన్న చిన్న పట్టణాలు, గ్రామాలు త్వరలో అభివృద్ధి చెందుతాయి. ఈ ప్రాంతాలలో భూమి లేదా గృహాలు కొనుగోలు చేయడం దీర్ఘకాలంలో మంచి పెట్టుబడిగా మారొచ్చు.నిర్మాణంలో ఉన్న ప్రాజెక్టుల కంటే, ఇప్పటికే పూర్తయిన ఇళ్లను కొనుగోలు చేయడం ద్వారా పన్ను ప్రయోజనాలు, EMI భారంపై స్పష్టత ఉంటుంది.

కోకాపేట రికార్డు ధరలు హైదరాబాద్ యొక్క ఆర్థిక శక్తిని, ముఖ్యంగా లగ్జరీ మార్కెట్ బలాన్ని తెలియజేస్తున్నాయి. అయితే, సామాన్య కొనుగోలుదారులు తమ బడ్జెట్‌ను దృష్టిలో ఉంచుకుని, నగరం యొక్క భవిష్యత్తు అభివృద్ధి ప్రాంతాలను పరిశీలిస్తే సొంతింటి కల నెరవేర్చుకోవచ్చు.

మరిన్ని తాజా వార్తల కోసం ఇక్కడ క్లిక్ చేయండి