Glocas9: భార‌త శాస్త్రవేత్తల గ్లోక్యాస్9 ఆవిష్కరణ..క్యాన్సర్‌ చికిత్స, జన్యు వ్యాధులకు ఆశలు..

Glocas9

జన్యు సంబంధిత వ్యాధులు (Genetic Diseases), క్యాన్సర్ చికిత్స రంగంలో సరికొత్త ఆశలు (Hopes) రేకెత్తిస్తూ భారత శాస్త్రవేత్తలు (Indian Scientists) ఒక అద్భుత ఆవిష్కరణ (Amazing Invention) చేశారు.

జన్యు సవరణ (Gene Editing) చేస్తున్నప్పుడు వెలుగును విరజిమ్మే ‘గ్లోక్యాస్9’ (GloCas9) అనే ఒక ప్రత్యేక క్రిస్పర్ ప్రొటీన్‌ను (CRISPR Protein) వీరు అభివృద్ధి చేశారు. కోల్‌కతాలోని బోస్ ఇన్‌స్టిట్యూట్ (Bose Institute) శాస్త్రవేత్తలు ఈ ఘనత సాధించారు.

సాధారణంగా క్రిస్పర్-క్యాస్9 (CRISPR-Cas9) టెక్నాలజీ ద్వారా డీఎన్‌ఏను కత్తిరించి, సరిచేయడం సాధ్యమే. కానీ, ఈ ప్రక్రియను జీవించి ఉన్న కణాల్లో (Living Cells) ప్రత్యక్షంగా చూడటం ఇప్పటివరకు సాధ్యపడలేదు. ఈ సమస్యను అధిగమించేందుకు డాక్టర్ బసుదేబ్ మాజి నేతృత్వంలోని బృందం ‘గ్లోక్యాస్9’ ను రూపొందించింది.

వీరు సముద్ర గర్భంలోని రొయ్యల ప్రొటీన్ల నుంచి సేకరించిన నానో-లూసిఫెరేజ్ (Nano-Luciferase) అనే ఎంజైమ్‌ను క్యాస్9 తో కలపడం ద్వారా దీనిని సృష్టించారు. జన్యు సవరణ సమయంలో ఈ ప్రొటీన్ మిణుకుమిణుకుమంటూ వెలుగును వెదజల్లుతుంది.

ఈ కొత్త ప్రొటీన్ సాయంతో, కణాలకు హాని కలగకుండానే (Non-invasive) జన్యు సవరణ ప్రక్రియను శాస్త్రవేత్తలు ప్రత్యక్షంగా పర్యవేక్షించవచ్చు. అంతేకాకుండా, సాధారణ క్యాస్9 ఎంజైమ్‌తో పోలిస్తే ‘గ్లోక్యాస్9’ అధిక ఉష్ణోగ్రతల వద్ద కూడా స్థిరంగా (Stable) పనిచేస్తుందని గుర్తించారు. ఇది ముఖ్యంగా సికిల్ సెల్ ఎనీమియా, కండరాల క్షీణత (Muscular Dystrophy) వంటి వ్యాధులకు కారణమైన జన్యు లోపాలను సరిచేసే హెచ్‌డీఆర్ (HDR) ప్రక్రియ కచ్చితత్వాన్ని గణనీయంగా పెంచుతుంది.

ఈ పరిశోధన వివరాలు ‘ఆంగేవాంటె కెమీ ఇంటర్నేషనల్ ఎడిషన్’ అనే అంతర్జాతీయ జర్నల్‌లో ప్రచురించారు. ఈ టెక్నాలజీని మొక్కలపై కూడా ప్రయోగించవచ్చని, పంటల అభివృద్ధిలో సురక్షితమైన మార్పులకు ఇది దోహదపడుతుందని శాస్త్రవేత్తలు తెలిపారు.

మరిన్ని తాజా వార్తల కోసం ఇక్కడ క్లిక్ చేయండి