Plums and Peaches: ప్లమ్ అండ్ పీచెస్‌లో క్యాన్సర్ నిరోధక శక్తి దాగి ఉందా? సైన్స్ ఏం చెబుతోంది?
Plums and Peaches: పండ్లలో సహజంగా లభించే కొన్ని సమ్మేళనాలు క్యాన్సర్ వంటి ప్రాణాంతక వ్యాధులను నివారించడంలో సహాయపడతాయని కొత్త అధ్యయనాలు సూచిస్తున్నాయి.
Plums and Peaches
ప్లమ్ అండ్ పీచ్ వంటి పండ్లలో కేవలం రుచి, పోషకాలు మాత్రమే కాకుండా, అనేక ఔషధ గుణాలు కూడా ఉన్నాయని శాస్త్రీయ పరిశోధనలు వెల్లడిస్తున్నాయి. ఈ పండ్లలో సహజంగా లభించే కొన్ని సమ్మేళనాలు క్యాన్సర్ వంటి ప్రాణాంతక వ్యాధులను నివారించడంలో సహాయపడతాయని కొత్త అధ్యయనాలు సూచిస్తున్నాయి. ఈ పండ్ల యొక్క క్యాన్సర్ నిరోధక శక్తికి ప్రధాన కారణం వాటిలోని పాలీఫెనాల్స్ ,ఇతర ఆమ్లాలు అని చెబుతున్నాయి.
ప్లమ్ అండ్ పీచెస్‌(plums and peaches)లో ఉండే పాలీఫెనాల్స్ క్యాన్సర్ కణాలను నాశనం చేయడంలో కీలక పాత్ర పోషిస్తాయి. ఈ సమ్మేళనాలు అపోప్టోసిస్ అనే ప్రక్రియను ప్రేరేపిస్తాయి. అపోప్టోసిస్ అంటే ‘ప్రోగ్రామ్డ్ సెల్ డెత్’ లేదా కణాలు స్వయంగా నాశనం కావడం. సాధారణంగా, కణాలకు ఏదైనా హాని కలిగినప్పుడు లేదా వాటి జీవిత కాలం ముగిసినప్పుడు అవి ఈ ప్రక్రియ ద్వారా తమను తాము నాశనం చేసుకుంటాయి. కానీ క్యాన్సర్ కణాలు ఈ ప్రక్రియను తప్పించుకుని, అనియంత్రితంగా పెరుగుతాయి. ప్లమ్‌లలోని పాలీఫెనాల్స్ ఊపిరితిత్తులు, కోలన్, రొమ్ము క్యాన్సర్ కణాలలో అపోప్టోసిస్‌ను తిరిగి ప్రేరేపించి, ఆ కణాల పెరుగుదలను నిలిపివేస్తాయి. ఈ ఫినాలిక్ సారాలు క్యాన్సర్ కణాల విస్తరణను నిరోధించడంలో (proliferation) కూడా ప్రభావవంతంగా పనిచేస్తాయని అధ్యయనాలు ధృవీకరించాయి.
సాధారణంగా, కీమోథెరపీ మందులు క్యాన్సర్ కణాలను నాశనం చేయడంతో పాటు ఆరోగ్యకరమైన కణాలను కూడా దెబ్బతీస్తాయి. అయితే, ప్లమ్ , పీచ్‌ల(Plums and Peaches)లోని పాలీఫెనాల్స్ చాలా తెలివిగా పనిచేస్తాయి. ఇవి అత్యంత ప్రమాదకరమైన క్యాన్సర్ కణాలను మాత్రమే లక్ష్యంగా చేసుకుని, ఆరోగ్యకరమైన కణాలకు ఎటువంటి హాని కలిగించకుండా కాపాడతాయి. ఈ ప్రత్యేకమైన లక్షణం వల్ల ఈ సమ్మేళనాలను భవిష్యత్తులో క్యాన్సర్ నివారణకు ఒక మంచి ప్రత్యామ్నాయంగా ఉపయోగించవచ్చని శాస్త్రవేత్తలు భావిస్తున్నారు.
ఈ క్యాన్సర్ నిరోధక శక్తికి ప్రధానంగా కారణం ప్లమ్‌లలో అధికంగా లభించే క్లోరోజెనిక్ యాసిడ్ (CA), నియోక్లోరోజెనిక్ యాసిడ్ (NCA). క్లోరోజెనిక్ యాసిడ్ తక్కువ మోతాదులో ఉన్నా సరే, క్యాన్సర్ కణాల వృద్ధిని నిరోధించి, అపోప్టోసిస్‌ను ప్రేరేపిస్తుంది. అదేవిధంగా, నియోక్లోరోజెనిక్ యాసిడ్ మానవ కోలన్ క్యాన్సర్ కణాల వృద్ధిని 60 నుంచి 90 శాతం వరకు తగ్గించి, బలమైన కెమోప్రివెంటివ్ లక్షణాలను చూపించింది. ఈ సమ్మేళనాలు క్యాన్సర్ వ్యాప్తిలో పాల్గొనే అనేక సిగ్నలింగ్ మార్గాలను కూడా నిరోధించి, వ్యాధిని అదుపులో ఉంచడంలో సహాయపడతాయి.
ఈ పరిశోధనలన్నీ ల్యాబొరేటరీలలో (in vitro) , కొన్ని జంతువులపై (animal studies) మాత్రమే జరిగాయి. ఈ ఫలితాలు చాలా ఆశాజనకంగా ఉన్నా కూడా, మనుషులపై పూర్తిస్థాయి క్లినికల్ ట్రయల్స్ ఇంకా జరగలేదు. అందువల్ల, ఈ పండ్లను క్యాన్సర్‌కు ఒక పూర్తిస్థాయి చికిత్సగా పరిగణించలేము. అయితే, ఈ పండ్లను ఆహారంలో భాగంగా తీసుకోవడం ద్వారా క్యాన్సర్ రాకుండా నివారించడానికి, చికిత్సలో ఒక సహాయక ఏజెంట్‌గా ఉపయోగించడానికి అవకాశం ఉందని శాస్త్రవేత్తలు సూచిస్తున్నారు.
మరిన్ని హెల్త్ అప్‌డేట్స్ కోసం ఇక్కడ క్లిక్ చేయండి
