Munnar:మున్నార్ ..మంచు మేఘాల మధ్య పచ్చని టీ తోటల అందాలు చూశారా?

Munnar

దక్షిణ భారతదేశంలో కేరళను “దేవుడి సొంత దేశం” అని పిలుస్తారు, ఆ పేరుకు నిలువెత్తు సాక్ష్యం మున్నార్(Munnar). పశ్చిమ కనుమల్లో సముద్ర మట్టానికి సుమారు 1600 మీటర్ల ఎత్తులో ఉన్న ఈ హిల్ స్టేషన్, ప్రకృతి ప్రేమికులకు ఒక స్వర్గం. మున్నార్ అంటే మూడు నదుల కలయిక అని అర్థం (ముతిరపుళా, నల్లతన్ని మరియు కుండల నదులు ఇక్కడ కలుస్తాయి).

మున్నార్(Munnar) చేరుకోగానే మనకు మొదట కనిపించేది మైళ్ల కొద్దీ పరుచుకున్న తేయాకు తోటలు. ఆ కొండల వాలులో పచ్చని తివాచీ పరిచినట్లుగా ఉండే టీ గార్డెన్స్ చూస్తుంటే కళ్లు తిప్పుకోలేం. ఇక్కడ ఎప్పుడూ కురిసే సన్నని చినుకులు, కొండలను తాకుతూ వెళ్లే మంచు మేఘాలు మనల్ని మరో లోకానికి తీసుకెళ్తాయి. బ్రిటిష్ కాలం నుండి మున్నార్ ఒక వేసవి విడిదిగా ప్రసిద్ధి చెందింది.

మున్నార్ (Munnar)లో చూడాల్సిన ప్రదేశాల్లో ఎరవికుళం నేషనల్ పార్క్ అతి ముఖ్యమైనది. ఇక్కడ మాత్రమే కనిపించే ‘నీలగిరి తార్’ అనే అరుదైన కొండ గొర్రెలను మనం చూడొచ్చు. అలాగే ఇక్కడ 12 ఏళ్లకు ఒకసారి పూసే ‘నీలకురింజి’ పువ్వులు ఒక ప్రత్యేక ఆకర్షణ. ఆ పువ్వులు పూసినప్పుడు కొండలన్నీ నీలం రంగులోకి మారిపోతాయి.

మున్నార్ లో టీ మ్యూజియం కూడా ఉంది, అక్కడ టీ పొడిని ఎలా తయారు చేస్తారో మనం స్వయంగా చూడవచ్చు. మట్టుపెట్టి డ్యామ్ దగ్గర బోటింగ్ చేయడం, ఎకో పాయింట్ లో గట్టిగా అరిస్తే మన మాటలే మళ్లీ వినిపించడం పర్యాటకులకు గొప్ప అనుభూతిని ఇస్తాయి.

ఫోటోగ్రఫీ అంటే ఇష్టం ఉన్న వారికి మున్నార్ లోని ప్రతి అడుగు ఒక అందమైన ఫ్రేమ్ లా కనిపిస్తుంది. వేసవి తాపం నుంచి తప్పించుకోవడానికి , ప్రశాంతమైన వాతావరణంలో గడపడానికి మున్నార్ ఒక సరైన ప్రదేశం.

Hampi: చరిత్రను ప్రేమించే వారి కోసం హంపి – రాతిలో విరిసిన శిల్పకళా సౌందర్యం