Fruits:ఆరోగ్యం కోసమే ఫ్రూట్స్ కానీ ఇలా తింటే అనారోగ్యమే..

Fruits

ఆరోగ్యకరమైన ఆహారం గురించి మాట్లాడినప్పుడు, పండ్లు లేకుండా ఆ జాబితా పూర్తి కాదు. బరువు తగ్గాలనుకునేవారు, అనారోగ్య సమస్యల నుంచి బయటపడాలనుకునేవారు, లేదా కేవలం ఆరోగ్యంగా ఉండాలనుకునేవారికి పండ్లు ఒక అద్భుతమైన వరం లాంటివి. వాటిలో ఉండే పోషకాలు, విటమిన్లు, మినరల్స్ మన శరీరానికి చాలా అవసరం. అయితే, ఫ్రూట్స్ తినే విషయంలో చాలా మందికి తెలియని కొన్ని ముఖ్యమైన విషయాలు ఉన్నాయి. వాటిని తెలుసుకుని సరైన పద్ధతిలో పండ్లను తింటేనే పూర్తి ప్రయోజనాలు పొందగలమని నిపుణులు చెబుతున్నారు.

పండ్ల(Fruits)ను ఎప్పుడు, ఎలా తినాలనే దానిపై కొందరికి కొన్ని సందేహాలు ఉంటాయి. అయితే ఈ తప్పులు చేయడం వల్ల పండ్ల నుంచి లభించే పోషకాలు పూర్తిగా మన శరీరానికి అందవు.

చాలామంది పండ్ల (Fruits)ముక్కలపై ఉప్పు, కారం లేదా పంచదార చల్లుకుని తింటారు. ఇలా తినడం వల్ల పండ్లలోని పోషకాల విలువ తగ్గుతుంది. అంతేకాకుండా, జీర్ణక్రియకు కూడా ఆటంకం కలుగుతుంది. కాబట్టి, పండ్లను వాటి సహజ రూపంలో మాత్రమే తినడం ఉత్తమం.

పండ్లను గబగబా మింగకుండా, బాగా నమిలి తినాలి. ఇలా చేయడం వల్ల జీర్ణవ్యవస్థ బలపడుతుంది, పండ్ల రసం, పోషకాలు శరీరం బాగా గ్రహిస్తుంది.

పండ్లను ముక్కలుగా కోసి తినడం కంటే, వాటిని పూర్తిగా తినడం ద్వారా వాటిలోని పీచు పదార్థం (ఫైబర్) పూర్తిగా అందుతుంది. ఈ ఫైబర్ జీర్ణక్రియను మెరుగుపరచి, మలబద్ధకం వంటి సమస్యలను తగ్గిస్తుంది.

పండ్లను తినడానికి ప్రత్యేక సమయం అంటూ ఏమీ లేకపోయినా, కొన్ని సమయాల్లో తింటే ఎక్కువ ప్రయోజనం ఉంటుందని నిపుణులు చెబుతున్నారు.

ఉదయం పూట బ్రేక్‌ఫాస్ట్ తర్వాత లేదా స్నాక్స్‌గా పండ్లను తీసుకోవడం చాలా మంచిది. సాయంత్రం వేళ వ్యాయామం లేదా యోగా చేసిన తర్వాత సాయంత్రం పండ్లను తినడం ద్వారా శరీరం తిరిగి శక్తిని పొందుతుంది. ఈ చిట్కాలు పాటిస్తూ ఫ్రూట్స్ తింటే, మనం వాటి నుంచి పూర్తిస్థాయిలో ఆరోగ్య ప్రయోజనాలు పొందొచ్చని నిపుణులు చెబుతున్నారు.